Basketball : U Rwanda rwasezerewe mu majonjora y'Igikombe cy'Isi
Ikipe y'Igihugu y'u Rwanda ya Basketball yasoje amahirwe yayo yo gukomeza mu kindi cyiciro cy'amajonjora y'Igikombe cy'Isi cya 2027, nyuma yo gutsindwa na Tunisia amanota 83-67 mu mukino wabaye ku wa Gatanu, tariki ya 3 Nyakanga 2026.
Ni inshuro ya kabiri yikurikiranya u Rwanda rusezerewe rutageze mu cyiciro cya kabiri cy'aya majonjora. Mu mikino itanu rumaze gukina, rwatsinzwemo itanu, ibintu byatumye rutakaza amahirwe yo gukomeza.
Mu mukino wahuje aya makipe yombi, u Rwanda rwagerageje guhangana na Tunisia mu bice bibiri bya mbere, ariko rwaje gusubiranwa mu gice cya kabiri ubwo Abanyatunizi bazamuraga urwego rw'imikinire yabo.
Firas Lahiani yabaye umukinnyi wahesheje intsinzi Tunisia, atsinda amanota 20 anafata imipira 12 yagaruye mu kibuga (rebounds). Uyu mukinnyi uzwi ku izina rya "Air Tunisia" kubera ubuhanga bwe no gusimbuka cyane, yagize uruhare rukomeye mu gutuma igihugu cye gikomeza guhatanira itike y'Igikombe cy'Isi.
Ku rundi ruhande, Tunisia yazamutse igira intsinzi eshatu mu mikino itanu, biyihesha amahirwe yo gukomeza mu cyiciro gikurikiyeho.
Nubwo yasezerewe, Ikipe y'Igihugu y'u Rwanda iracyafite umukino umwe wo gusoza imikino yo mu Itsinda C, aho itegerejwe guhura na Nigeria ku Cyumweru, mu mukino uzaba ari uwo kurangiza uru rugendo rw'amajonjora.
Ibitekerezo