Chelsea mu nzira zisinyisha Myugariro wa Crystal Palace
Ikipe ya Chelsea iri mu marembo yo kurangiza amasezerano yo kugura myugariro wo hagati Maxence Lacroix ukinira Crystal Palace, nyuma y'uko uyu mukinnyi ageze i Londres gukora isuzuma ry'ubuzima (medical) ribanziriza gusinya amasezerano.
Amakuru aturuka mu Bwongereza avuga ko impande zombi zamaze kumvikana, aho Chelsea izishyura Crystal Palace miliyoni 52 z'Amapawundi kugira ngo ibone uyu Mufaransa w'imyaka 26.
Lacroix yari amaze igihe ari mu bakinnyi bifuzwaga n'umutoza wa Chelsea, cyane cyane muri gahunda yo kongera kubaka ubwugarizi bw'iyi kipe mbere y'uko umwaka w'imikino mushya utangira. Ibiganiro byihuse byatangiye nyuma y'uko Igikombe cy'Isi kirangiye, aho uyu myugariro yari ahamagawe mu Ikipe y'Igihugu y'u Bufaransa.
Kuva yagera muri Crystal Palace mu 2024 avuye muri Wolfsburg yo mu Budage, Lacroix yabaye umwe mu nkingi za mwamba z'ubwugarizi bw'iyi kipe. Yagize uruhare rukomeye mu gutwara ibikombe birimo FA Cup, Community Shield na UEFA Conference League.
Nubwo Crystal Palace yifuzaga gukomezanya na we, ubuyobozi bw'iyi kipe bwemeye ko umukinnyi ashaka kugerageza indi ntambwe mu mwuga we. Ni yo mpamvu bwatangiye gushakisha abandi basimbura, barimo Chrislain Matsima wa Augsburg, mu gihe Charlie Cresswell wahoze ari mu bo bwifuzaga asa n'uri hafi kwerekeza muri Rennes yo mu Bufaransa.
Mu biganiro hagati y'impande zombi, izina rya Axel Disasi wa Chelsea na ryo ryagarutsweho nk'umwe mu bashobora kwerekeza muri Crystal Palace. Chelsea irifuza kumugurisha burundu ku mafaranga agera kuri miliyoni 25 z'Amapawundi, nubwo impande zombi zishobora no kumvikana ku masezerano y'ubwishingizi bwo kumutiza akazagurwa nyuma.
INDI NKURU WASOMA : Hatoraguwe umurambo w’umugabo utaramenyekana
Lacroix naramuka asinye, azaba abaye umukinnyi wa gatatu Chelsea iguze muri iyi mpeshyi nyuma ya Marco Palestra na Morgan Rogers. Iyi kipe kandi yamaze kumvikana n'abakinnyi Emmanuel Emegha na Geovany Quenda bazayigeraho nyuma y'amasezerano bagiranye n'amakipe yabo.
Ibitekerezo