Dr. Eugène Rwamucyo yahinduye imvugo ku mubano we na Pauline Nyiramasuhuko
Dr. Eugène Rwamucyo, uri kuburanira ubujurire mu Rukiko rwa Rubanda rwa Paris mu Bufaransa ku byaha bya Jenoside yakorewe Abatutsi n'ibyibasiye inyokomuntu, yongeye kwisobanura ku bivugwa ko yari afitanye umubano na Pauline Nyiramasuhuko, wahoze ari Minisitiri w'Umuryango n'Iterambere ry'Umugore.
Mu iburanisha ryabaye kuva muri Kamena 2026, Dr. Rwamucyo yabanje kubwira urukiko ko atigeze akorana na Nyiramasuhuko, ndetse ko batigeze bagirana gahunda iyo ari yo yose. Yasobanuye ko icyo azi ari uko bigeze kubisikanira ku biro bya ONAPO i Butare.
Icyakora, Umushinjacyaha yamweretse agenda ya Nyiramasuhuko, aho izina rye ndetse na nimero ya telefone ye bigaragara. Mu gusubiza, Dr. Rwamucyo yabanje kuvuga ko uwo wanditse muri iyo agenda atari we, ahubwo ko hari undi muntu witwaga Eugène Rwamucyo wari utuye i Butare.
Nyuma y'iminsi ibiri, yongeye kubazwa kuri iyo nyandiko, ahindura imvugo yemera ko ari we ugaragara muri agenda ya Nyiramasuhuko, ariko avuga ko atazi uburyo amazina ye n'andi makuru ye byashyizwemo.
Yagize ati: "Kubera iki nongerewe kuri za agenda?", agaragaza ko atigeze amenyeshwa ko amakuru ye yanditswe muri ako gatabo.
INDI NKURU WASOMA :Uko ibiciro by’Ibikomoka kuri Peteroli byagiye bihinduka mu Rwanda
Umuryango CPCR, ukurikirana abakekwaho uruhare muri Jenoside yakorewe Abatutsi, uvuga ko agenda ya Nyiramasuhuko igaragaza ko yari afitanye umubano wa hafi na Dr. Rwamucyo, ndetse ko bahuriraga mu nama zitandukanye.
Urubanza rw'ubujurire rwa Dr. Rwamucyo rurakomeje, aho urukiko ruzasuzuma ibimenyetso n'ibisobanuro bitangwa n'impande zombi mbere yo gufata umwanzuro.
Ibitekerezo