DRC : Ebola imaze kwica abantu 828

Intara ya Ituri ni yo ikomeje kwibasirwa cyane n’iki cyorezo kurusha izindi ntara enye cyagezemo. Nubwo bimeze bityo, Minisiteri y’Ubuzima ivuga ko yakajije ingamba zo kugikumira no kugabanya ubwandu.

Muri Kivu y’Amajyaruguru, isuzuma ku bantu bagaragaza ibimenyetso bya Ebola rigeze ku kigero cya 93,9%, mu gihe 91,7% by’abahuye n’abanduye bari gukurikiranwa. Abashinzwe ubuzima bavuga ko ibi bitanga icyizere cyo kugenzura neza icyorezo muri iyi ntara.

Ku rundi ruhande, Kivu y’Amajyepfo ntikibarirwa mu duce twugarijwe na Ebola, kuko hashize iminsi 50 nta murwayi mushya ugaragayeyo. Abantu batatu gusa ni bo bari baranduye muri Miti-Murhesa, umwe ahasiga ubuzima mu gihe babiri bakize.

Nubwo ibikorwa byo kurwanya Ebola bikomeje, abaganga n’abakozi b’imiryango y’ubutabazi bavuga ko bahura n’imbogamizi zikomeye zirimo umutekano muke n’imyumvire y’abaturage bamwe badaha uburemere iki cyorezo.

INDI NKURU WASOMA : Ijezi Pelé yambaye ku mukino wa nyuma w’Igikombe cy’Isi cya 1958 ryagurishijwe akayabo

Ibi byatumye hari aho abaganga n’abatabazi baterwa iyo bagiye gukurikirana abahuye n’abarwayi cyangwa abafite ibimenyetso bya Ebola. Hari n’igihe abaturage batera amavuriro bashaka gutorokesha abarwayi babo.

Urugero rwa vuba ni igitero cyagabwe ku bitaro bya Nyankunde muri Ituri ku wa 15 Nyakanga, cyatumye abarwayi bane ba Ebola batoroka, mu gihe bamwe mu bakozi b’imiryango mpuzamahanga bahungiye mu Mujyi wa Bunia.