DRC na M23 bumvikanye ku nzira iganisha ku mahoro
Guverinoma ya Repubulika Iharanira Demokarasi ya Congo (RDC) n’umutwe wa M23 bemeranyije ku mugambi w’ibikorwa ugamije gusubiza amahoro mu burasirazuba bw’igihugu [Road map], nyuma y’iminsi itanu y’ibiganiro byabereye mu Busuwisi.
Mu itangazo ryashyizwe ahagaragara nyuma y’ibiganiro, impande zombi zavuze ko ziyemeje gukomeza imishyikirano igamije kugera ku mahoro arambye no gukemura amakimbirane, ndetse zemeranya gushyiraho uburyo bwo gukurikirana iyubahirizwa ry’agahenge.
Iyi roadmap igaragaza gahunda n’igihe ibiganiro bizakorerwa, hashingiwe ku masezerano y’amahoro yashyizweho umukono mu 2025 ku bufasha bwa Leta Zunze Ubumwe za Amerika. Icyakora, imirwano yakomeje kuba hagati y’ingabo za RDC na M23 nubwo hari amasezerano y’agahenge yari yaratangajwe.
Abitabiriye ibiganiro barimo M23, Guverinoma ya RDC, Qatar, Leta Zunze Ubumwe za Amerika, Togo, Komisiyo y’Umuryango wa Afurika Yunze Ubumwe ndetse n’u Busuwisi bwakiriye ibiganiro.
Impande zombi kandi zemeranyije gushyiraho uburyo bwo gusuzuma aho ishyirwa mu bikorwa ry’amasezerano rigeze no gukemura ibibazo bishobora kubangamira inzira y’amahoro.
Muri gahunda nshya, hazashyirwaho n’uburyo bwo gukurikirana amakosa cyangwa ibindi bikorwa binyuranyije n’agahenge. Ubugenzuzi bwa mbere bwari buteganyijwe gukorerwa i Minembwe, muri Kivu y’Amajyepfo.
INDI NKURU WASOMA : Carrick yifashe ku bya Baleba nyuma yo gutsindwa na Hull City
Nubwo hari intambwe imaze guterwa, haracyari ibyo impande zombi zitumvikanaho, birimo ibihano byafatiwe M23, irekurwa ry’abantu bafunzwe ndetse n’igihe ivugurura rya politiki rizatangirira.
Amakimbirane yo mu burasirazuba bwa RDC afitanye isano n’umwuka mubi umaze igihe hagati ya RDC n’u Rwanda. Kigali ishinja RDC kutarandura umutwe wa FDLR, mu gihe Kinshasa ishinja u Rwanda gushyigikira M23. U Rwanda ruhakana ibi birego.
Ibitekerezo