Haringingo yijeje Aba-Rayon Sports igikombe cya CECAFA Kagame Cup nyuma y'imyaka 28
Umutoza wa Rayon Sports, Haringingo Francis Christian, yavuze ko we n'abakinnyi be biteguye gukora ibishoboka byose kugira ngo begukane igikombe cya CECAFA Kagame Cup 2026, bavuga ko igihe kigeze ngo iyi kipe yongere kucyegukana nyuma y'imyaka 28.
Yabitangaje nyuma y'uko Rayon Sports itsinze Jamus FC yo muri Sudani y'Epfo ibitego 3-1 muri ½ cy'irangiza, ikabona itike yo gukina umukino wa nyuma. Ni intsinzi ya gatandatu yikurikiranya iyi kipe ibonye mu mikino mpuzamahanga.
Haringingo yavuze ko nubwo Jamus FC ari ikipe ikomeye, abakinnyi be binjiye mu mukino bazi icyo bashaka.
Yagize ati: "Jamus FC ni ikipe ikomeye cyane. Mu mikino twakinnye, uyu ni umwe mu yatugoye. Twateguye abakinnyi mu mutwe, kandi badushyiriye mu bikorwa ibyo twari twabasabye."
Ku mukino wa nyuma uzabahuza na Gor Mahia yo muri Kenya, Haringingo yavuze ko ari ikipe yubaha, ariko ko ibyo bitazabuza Rayon Sports guhatanira igikombe n'imbaraga zose.
Ati: "Gor Mahia ni ikipe nkuru kandi nziza. Natwe tumaze imyaka 28 tudatwara CECAFA Kagame Cup, bo bamaze imyaka 41. Twese turagishaka, ariko tugiye gukora ibishoboka byose kugira ngo kize i Kigali."
Uyu mutoza yongeyeho ko nubwo Rayon Sports na Gor Mahia ari amakipe afitanye umubano mwiza, nibagera mu kibuga buri ruhande ruzaharanira intsinzi.
Yagize ati: "Turi inshuti, turi no kubana muri hoteli imwe, ariko mu kibuga bizaba bitandukanye. Umukino uzaba ukomeye kandi ushimishe abakunzi b'umupira w'amaguru."
INDI NKURU WASOMA : Umuraperikazi Fifi Raya yambitswe impeta y'urukundo
Rayon Sports iheruka gutwara CECAFA Kagame Cup mu 1998, mu gihe Gor Mahia iheruka kwegukana iri rushanwa hashize imyaka 41. Amakipe yombi aheruka guhura ku Munsi w'Igikundiro, umukino warangiye Rayon Sports itsinze ibitego 2-0.
Ibitekerezo