Imbamutima z'uwabaye Rutahizamu wa Rayon Sports werekeje mu Bushinwa
Rutahizamu w'Ikipe y'Igihugu y'u Rwanda mu mupira w'amaguru w'abagore, Jeannine Mukandayisenga, yavuze ko kwerekeza muri Wuhan Jiangda yo mu Cyiciro cya Mbere mu Bushinwa ari intambwe ikomeye mu rugendo rwe rw'umwuga, anashimangira ko yiteguye gukomeza gutsinda ibitego no gufasha iyi kipe kugera ku ntego zayo.
Uyu mukinnyi aherutse gusinyira Wuhan Jiangda, ikipe yegukanye Shampiyona y'u Bushinwa, nyuma yo kuva muri Yanga Princesses yo muri Tanzania. Bivugwa ko iyi kipe yamutanzeho ibihumbi 50 by'Amadolari ya Amerika, asaga miliyoni 73 Frw.
Mukandayisenga yavuze ko gukina ruhago ari inzozi yagize kuva akiri muto, bityo kubona amahirwe yo kwerekeza mu ikipe ikomeye nk'iyi ari ikintu kimushimishije cyane.
Yagize ati: "Umupira w'amaguru ni inzozi zanjye kuva nkiri umwana. Nishimiye kwinjira mu ikipe ikomeye kandi intego yanjye ni ugutsinda ibitego no gufasha bagenzi banjye kugera ku ntsinzi,"Nkuko yabitangarije The New Times.
Yakomeje avuga ko icyizere yagiriwe n'ubuyobozi bwa Wuhan Jiangda cyamwongereye imbaraga zo gukora cyane kugira ngo yigaragaze muri shampiyona ifatwa nk'imwe mu zikomeye ku mugabane wa Aziya.
Uyu rutahizamu ageze mu Bushinwa nyuma yo kwitwara neza muri Tanzania, aho yatsinze ibitego 20 muri shampiyona mu myaka y'imikino ibiri yikurikiranya.
Mbere yo kujya muri Yanga Princesses, Mukandayisenga yakiniye Inyemera WFC, nyuma aza kwerekeza muri Rayon Sports WFC, aho yagize uruhare rukomeye mu gutwara igikombe cya Shampiyona y'Abagore n'Igikombe cy'Amahoro mu 2024, anatanga umusaruro udasanzwe harimo gutsinda ibitego byinshi n'ibitego bitatu mu mukino umwe inshuro zitandukanye.
Ibitekerezo