Inter Miami iri gukorwaho iperereza nyuma yo gusinyisha Casemiro
Ikipe ya Inter Miami yo muri Shampiyona ya Leta Zunze Ubumwe za Amerika (MLS) yatangiye gukorwaho iperereza nyuma yo gusinyisha Umunya-Brésil Casemiro, bikekwa ko habayeho kurenga ku mategeko agenga iyandikwa ry'abakinnyi.
Ku wa 22 Nyakanga 2026, Inter Miami yatangaje ko yasinyishije Casemiro w'imyaka 34, wari usoje amasezerano muri Manchester United. Uyu mukinnyi yasinyiye iyi kipe kugeza mu mpera za shampiyona ya 2027, hakaba harimo amahirwe yo kongera amasezerano kugeza muri Kamena 2029.
Icyakora, nyuma y'itangazo rya Inter Miami, MLS yahise itangaza ko yatangiye gusuzuma ibirego bivuga ko iyi kipe yaba yarishe amategeko ajyanye n'uburenganzira bwo kuganira n'umukinnyi mbere yo kumusinyisha.
Iri perereza rishingiye ku mategeko ya MLS azwi nka Discovery Rights, aha ikipe imwe uburenganzira bwo kubanza kuganira n'umukinnyi mbere y'andi makipe. Mbere yo kwerekeza muri Inter Miami, ubu burenganzira bwari bufitwe na LA Galaxy.
Nubwo Inter Miami na LA Galaxy byemeje ko byageze ku masezerano yo kwimurira ubu burenganzira, MLS yavuze ko ibisobanuro birambuye kuri ayo masezerano bizatangazwa nyuma y'iperereza.
INDI NKURU WASOMA :Thomas Tuchel azakomeza gutoza u Bwongereza bwasezerewe na Argentine
Casemiro yasezeye muri Manchester United nyuma yo kuyikinira imikino 160, ayitsindira ibitego 26 anatanga imipira 14 yavuyemo ibitego. Yanegukanye FA Cup na Carabao Cup, mbere yaho akaba yari yaranditse amateka muri Real Madrid aho yegukanye Champions League inshuro eshanu.
Muri Inter Miami, Casemiro agiye gukinana n'ibyamamare birimo Lionel Messi, Rodrigo De Paul na Sergio Reguilón.
Ibitekerezo