Kamonyi: Abagabo umunani barakekwaho gutema mugenzi wabo ikiganza
Polisi y’u Rwanda mu Ntara y’Amajyepfo yataye muri yombi abantu umunani bakekwaho kugira uruhare mu rugomo rwakorewe umugabo w’imyaka 39, Twibanire Emmanuel, watemwe ikiganza kikavaho nyuma y’amakimbirane yari amaze igihe hagati ye n’abo bakoranaga ubucukuzi bw’amabuye y’agaciro butemewe n’amategeko.
Ibi byabereye mu Mudugudu wa Nyenga, Akagari ka Bugoba, Umurenge wa Rukoma mu Karere ka Kamonyi, ku wa 13 Ukwakira 2026.
Amakuru avuga ko abo bagabo bari basanzwe bakorana ubucukuzi bw’amabuye y’agaciro nta ruhushya, bagiye kunywa inzoga barasinda, maze amakimbirane bari bafitanye arongera avuka. Ni bwo Twibanire yakomerekejwe bikomeye, ikiganza kikavaho.
Umuvugizi wa Polisi mu Ntara y’Amajyepfo, CIP Kamanzi Hassan, yabwiye IGIHE ko Polisi ikimara kumenya ibyabaye yahise itabara, ita muri yombi abantu umunani bakekwaho kugira uruhare muri urwo rugomo.
Yagize ati: “Iperereza rirakomeje kandi n’undi uwo ari we wese wagaragara ko yagize uruhare muri urwo rugomo ndetse n’ubucukuzi bw’amabuye y’agaciro butemewe bose Polisi ntawe izihanganira barafatwa bafungwe.”
INDI NKURU WASOMA : Mutesi Jolly yanenze ababona ko u Rwanda rudakwiye kurota Formula 1 rugifite ibibazo
Abakekwa bafungiye kuri Sitasiyo ya Polisi ya Rukoma mu gihe Twibanire ari kwitabwaho n’abaganga mu Bitaro bya Remera Rukoma.
Polisi yibukije abaturage kwirinda urugomo n’ibindi bikorwa binyuranyije n’amategeko, ibasaba gutanga amakuru ku gihe ku bikorwa bishobora guhungabanya umutekano.
Ibitekerezo