Kigali mu mwijima: Ibibazo by’ibura rya hato na hato ry’umuriro bikomeje gutera abaturage n’abacuruzi akababaro
Kuri uyu wa Gatatu tariki ya 1 Mata 2026, igice kinini cy’Umujyi wa Kigali n’utundi duce tw’igihugu byamaze amasaha asaga atatu mu mwijima bitewe n’ibura ry’umuriro w’amashanyarazi ryatangiye saa kumi n'ebyiri n'igice (18:30). Kugeza ubu, sosiyete ishinzwe ingufu (REG) ntiratangaza icyateye iri bura ririmo kugaragara kenshi kuva uyu mwaka watangira.
Umujyi wa Kigali wagizweho ingaruka zikomeye
Uyu mugoroba, abaturage bo mu bice bitandukanye by’umujyi wa Kigali nka Kanombe, Remera, Kicukiro, n’ibice bimwe by’i Nyarugenge bavuze ko umuriro wagiye mu buryo butunguranye, ukagaruka saa tatu n'igice z'ijoro (21:30). Iri bura ry’umuriro ryageze no mu bindi bice by’igihugu, bituma benshi bibaza niba hari ikibazo gikomeye mu miyoboro migari mugari y’igihugu.
Iri bura ry’umuriro ryagize ingaruka zikomeye ku bikorwa by’ubucuruzi n’ubuzima bwa buri munsi:
Abacuruzi bato: Inzu zogosha, amahoteli mato, n’amaduka adafite imashini zitanga umuriro (Generators) bavuze ko bahombye inyungu bari bategereje uyu mugoroba.
Abanyeshuri:Â Abanyeshuri bari mu rugo bitegura ibizamini cyangwa bakora imikoro (homework) bavuze ko byabagoye gukoresha amatara ya buji cyangwa itara rya telefone.
Umutekano:Â Bamwe mu baturage bavuze ko umwijima mu muhanda utuma bagira impungenge z'umutekano wabo iyo bataha nijoro.
Abanyarwanda bakoresha imbuga nkoranyambaga by’umwihariko urubuga rwa X (Twitter), bagaragaje ko batishimiye iri bura ry'umuriro kuko ari ibintu bimaze kuba inshuro nyinshi kandi mu masaha y'ikigoroba.
Ese hari icyizere cy'umuti urambye?
Nubwo REG itaragira icyo ivuga kuri iri bura ry'umuriro ryo kuri uyu mugoroba, hari hashize iminsi itangaje ko hari imishinga yo gusana imiyoboro yashaje mu mujyi wa Kigali. Ariko rero, ku bakoresha amashanyarazi mu bucuruzi, buri gihe iyo umuriro ubuze aba ari igihombo kidashobora kwishyurwa.
Turacyategereje itangazo rya REG kugira ngo tumenye icyateye iki kibazo cyo kubura umuriro.
Ibitekerezo