Kigali : Umunya-Sénégal ukurikiranyweho iyezandonke yasabiwe gufungwa
Urukiko rw'Ibanze rwa Kicukiro rwatangiye kuburanisha Umunya-Sénégal witwa Bokanga Peter, ukurikiranyweho ibyaha bine birimo iyezandonke no kutabasha gusobanura inkomoko y'amafaranga arenga miliyoni 100 Frw yanyujijwe kuri konti ze. Ubushinjacyaha bwasabye ko afungwa by'agateganyo iminsi 30.
Bokanga watawe muri yombi n'Urwego rw'Igihugu rw'Ubugenzacyaha (RIB) nyuma y'ikirego cyatanzwe n'Urwego rushinzwe Ubutasi ku Mari (FIC), akurikiranyweho kudasobanura inkomoko y'umutungo, iyezandonke, gukora inyandiko mpimbano no kuzikoresha.
Ubushinjacyaha bwabwiye urukiko ko hagati y'Ukwakira 2022 na Kanama 2023, kuri konti ze zo muri Equity Bank Rwanda, Ecobank Rwanda na Mobile Money haciye amafaranga arenga miliyoni 100 Frw, nyamara uregwa ntiyashoboye kugaragaza ibimenyetso byerekana inkomoko yayo.
Bwanavuze ko muri ayo mafaranga harimo miliyoni 19 Frw yoherejwe avuye muri Ecobank Sénégal, ndetse ko andi yakoreshejwe mu kugura imodoka zigera kuri 12 na moto, ibintu bushinja ko byakozwe hagamijwe kweza amafaranga akomoka ahantu hadasobanutse.
Ku byaha by'inyandiko mpimbano, Ubushinjacyaha bwagaragaje ko Bokanga yasanganywe pasiporo ebyiri z'impimbano zo muri Lesotho na Bahamas, zose ziriho amazina atandukanye.
INDI NKURU WASOMA : Kagame na Perezida wa Estonia baganiriye ku gushimangira ubufatanye mu ikoranabuhanga
Mu kwiregura, Bokanga yahakanye ibyaha byose, avuga ko amafaranga yakomokaga mu bucuruzi bwe bwa resitora, akabari n'ibikorwa by'imikino y'amahirwe yakoreraga mu Rwanda, ndetse no mu bucuruzi bwa telefone yakoraga muri Sénégal.
Yasabye urukiko kuzamuburanisha adafunzwe, asobanura ko afite umugore w'Umunyarwandakazi, abana babiri n'aho atuye hazwi, bityo nta mpamvu yo gutoroka ubutabera.
Urukiko rw'Ibanze rwa Kicukiro ruzatangaza umwanzuro ku busabe bwo kumufunga cyangwa kumurekura by'agateganyo ku wa 16 Nyakanga 2026.
Ibitekerezo