Mbappé akomeje kurya isataburenge Lionel Messi

Uyu mukino wabereye muri East Rutherford, Mbappé yafunguye amazamu ku munota wa 45 atsinda igitego cyiza nyuma yo kwinjira mu rubuga rw’amahina aciye ku ruhande rw'ibumoso. Nyuma y'iminota umunani igice cya kabiri gitangiye, Michael Olise yahaye umupira Bradley Barcola awushyira mu izamu, u Bufaransa bubona igitego cya kabiri.

Ku munota wa 74, Mbappé yongeye kunyeganyeza inshundura nyuma yo gucika ba myugariro ba Suède, atsinda igitego cya gatatu cyashimangiye intsinzi y'Abafaransa.

Ibi bitego byatumye Mbappé agira ibitego bitandatu muri iri rushanwa, ahita anganya na Lionel Messi mu rugamba rwo gutwara igihembo cy'umukinnyi uzasoza Igikombe cy'Isi ari we umaze gutsinda ibitego byinshi.

Si ibyo gusa kuko uyu rutahizamu yahise aca agahigo ko kuba umukinnyi umaze gutsinda ibitego 10 mu mikino yo guhatanira igikombe nyuma y'amatsinda, arusha abanya-Brésil Leônidas na Ronaldo, bari bafite umunani.

Mbappé kandi agejeje ku bitego 18 mu mikino 18 amaze gukina mu Gikombe cy'Isi, asigara inyuma ya Lionel Messi igitego kimwe gusa ku rutonde rw'abamaze gutsinda ibitego byinshi mu mateka y'iri rushanwa.

Ku ruhande rw'umutoza Didier Deschamps na we yakomeje kwandika amateka, kuko intsinzi y'u Bufaransa yabaye iya 18 amaze kubona atoza mu Gikombe cy'Isi, ibintu bituma akomeza kuba umutoza umaze gutsinda imikino myinshi kurusha abandi muri iri rushanwa.

U Bufaransa buzahura na Paraguay muri 1/8 cy'irangiza.