Mukura VS yizeye kuba ikipe izahagarika Rayon Sports muri Super Coupe
Umuvugizi wa Mukura Victory Sports & Loisirs, Gatera Edmond, yavuze ko ikipe ahagarariye ari yo yonyine yiteguye guhangana na Rayon Sports no kuyitsinda, mu gihe amakipe yombi yazahurira ku mukino wa nyuma wa Super Coupe.
Iri rushanwa rizatangira ku wa Kane, tariki ya 27 Kanama 2026, kuri Kigali Pelé Stadium, hakinwa imikino ya ½ cy’irushanwa. Kiyovu Sports izabanza gukina na Mukura VS, mbere y’uko Rayon Sports ihura na Police FC.
Gatera yabwiye SK FM ko icyizere afitiye Mukura VS gishingiye no ku mutoza w’iyi kipe, avuga ko ibikombe yagiye aharanira mu makipe yagiye atoza, ari byo yagiye atwara.
Yavuze kandi ko Mukura VS ifite abakinnyi bakomeye kandi yiteguye guhagarika Rayon Sports, ikipe iri mu bihe byiza kuva yatangira kwitegura umwaka w’imikino wa 2026/2027.
Ati: “Nta yindi kipe tubona ishobora guharika iyi Rayons Sports uretse Mukura ubu tuvugana. None se izindi ko zayinaniwe muri aka karere. N’abandi turi kwakira ubusabe bwabo, nta wundi muntu utegereje indi kipe ngo ihagarike iyi Rayon Sports yigize akari aha kajyahe uretse Mukura VS.”
INDI NKURU WASOMA : Misiri ishobora gutegura umukino w’amateka n’Amavubi
Rayon Sports imaze gutsinda imikino icyenda yose yakinnye mu mikino ya gicuti n’iyitegura umwaka mushya w’imikino. Muri iyo mikino, iyi kipe imaze gutsinda ibitego birenga 15, mu gihe yo yinjijwe ibitego bitandatu gusa.
Ibi bituma umukino Rayon Sports ishobora guhuramo na Mukura VS utegerejwe cyane, cyane ko Mukura yifuza kwerekana ko ifite ubushobozi bwo guhagarika iyi kipe y’i Nyanza iri kwigaragaza cyane mu mikino yo kwitegura umwaka mushya.
Gatera n’ikipe ye bazabanza guhangana na Kiyovu Sports, mu gihe Rayon Sports yo izabanza gucakirana na Police FC. Amakipe azatsinda iyi mikino ni yo azahurira ku mukino wa nyuma wa Super Coupe.
Ibitekerezo