Rayon Sports yibitseho uwakiniye Wydad, Simba na Al Hilal
Rayon Sports ikomeje gukomeza ubusatirizi bwayo mu kwitegura umwaka w’imikino wa 2026/27, aho yasinyishije myugariro w’Umunya-Côte d’Ivoire, Mohamed Ouattara, usanzwe afite ubunararibonye bwo gukina mu makipe akomeye muri Afurika.
Iyi kipe yatangaje uyu mukinnyi mu ijoro ryo ku Cyumweru, tariki ya 9 Kanama 2026, nyuma y’iminsi mike yegukanye igikombe cya CECAFA Kagame Cup 2026.
Ouattara w’imyaka 33 yakiniye amakipe atandukanye yo muri Afurika, arimo Wydad Casablanca yo muri Maroc, Simba SC yo muri Tanzania na Al Hilal yo muri Sudani. Yabaye kandi muri Al Ain yo muri Leta Zunze Ubumwe z’Abarabu, aho yakinnye mu cyiciro cya mbere.
Uyu mukinnyi aje kongera ubunararibonye mu bwugarizi bwa Rayon Sports busanzwe burimo Ndayishimiye Didier, Matumona Wakonda Kanda Abbel na Charles Tchouplaou.
Kugura Ouattara biri mu bikorwa Rayon Sports ikomeje gukora kugira ngo yongere imbaraga mu ikipe izakina amarushanwa atandukanye mu mwaka w’imikino utaha.
Amakuru avuga ko iyi kipe yiteganya kongera gusinyisha abandi bakinnyi bane, barimo umukinnyi ukina hagati yugarira, ukina aca ku mpande ndetse na rutahizamu.
INDI NKURU WASOMA : Imwe mu mibare yavuye muri CECAFA Kagame Cup 2026
Rayon Sports kandi iri kwitegura imikino ya Super Coupe iteganyijwe hagati ya tariki ya 22 n’iya 28 Kanama 2026, aho izatangira ihura na Police FC.
Nyuma y’iyo mikino, Rayon Sports izatangira urugendo muri BK Pro League ndetse na CAF Confederation Cup ya 2026/27. Muri iri rushanwa ryo ku rwego rwa Afurika, yatomboye Panthère Sportive du Ndé yo muri Cameroun mu ijonjora rya mbere.
Ibitekerezo