Trump yatangaje ko agahenge hagati ya Amerika na Iran karangiye

Ibi Trump yabivugiye mu nama yahuje Umuryango wa OTAN (NATO) yabereye i Ankara muri Turukiya, aho yavuze ko atagishishikajwe no gukomeza ibiganiro na Iran.

Yagize ati: "Njye mbona byarangiye. Nta mpamvu yo gukomeza kuganira na bo kuko mbona ari uguta igihe."

Aya magambo aje nyuma y'uko Amerika igabye ibitero simusiga ku birindiro bya Iran, ivuga ko ari ukwihimura ku bitero byagabwe ku mato atatu y'ubucuruzi yanyuraga mu Nyanja ya Hormuz, inzira ifatwa nk'ingenzi mu bucuruzi mpuzamahanga bw'ibikomoka kuri peteroli.

Igisirikare cya Amerika cyatangaje ko cyarashe ibirindiro birenga 80 birimo uburyo bwo kurinda ikirere, ibigo bigenzura ibikorwa bya gisirikare ndetse n'ibisasu birasa amato.

Cyavuze kandi ko cyangije amato mato arenga 60 y'umutwe wa Islamic Revolutionary Guard Corps (IRGC), mu rwego rwo kugabanya ubushobozi bwa Iran bwo guhungabanya ubucuruzi bwo mu nyanja.

INDI NKURU WASOMA : Shaddyboo yajyanywe muri Rehab

Ku rundi ruhande, Iran yamaganye ibyo bitero, ivuga ko Amerika yishe amasezerano y'agahenge impande zombi zari zaragiranye ukwezi gushize. Minisiteri y'Ububanyi n'Amahanga ya Iran yavuze ko icyo gitero ari ukurenga ku bwumvikane bwari bugamije guhagarika intambara.

Iran yongeye gushimangira ko izakomeza kurinda ubusugire bwayo ndetse n'umutekano wayo, ivuga ko itazihanganira ibitero bya gisirikare bya Amerika.

Hagati aho, amakuru y'iri zamuka ry'umwuka mubi hagati y'ibihugu byombi yahise agira ingaruka ku isoko mpuzamahanga rya peteroli. Igiciro cya Brent Crude cyazamutse hafi 6%, mu gihe n'icya West Texas Intermediate (WTI) na cyo cyazamutse ku rwego rugaragara.