U Rwanda rwasabye miliyoni $86 zo guhangana n’ibiza
Guverinoma y'u Rwanda yasabye inkunga ya miliyoni 86,2 z'Amadolari ya Amerika (arenga miliyari 120 Frw) mu mushinga ugamije kongera ubushobozi bw'igihugu bwo kwitegura no guhangana n'ibiza biterwa n'imihindagurikire y'ibihe.
Minisitiri ushinzwe Ibikorwa by'Ubutabazi, Maj. Gen. (Rtd) Albert Murasira, yavuze ko muri ayo mafaranga, miliyoni 10 z'Amayero zamaze kwemezwa binyuze muri gahunda mpuzamahanga ya Global Shield against Climate Risks, ifasha ibihugu kwitegura ibiza nk'imyuzure, amapfa, inkubi z'umuyaga n'ubushyuhe bukabije.
Yavuze kandi ko u Rwanda rukomeje gukorana na Banki y'Isi mu gushaka izindi nkunga zihutirwa zirimo gahunda ya Catastrophe Deferred Drawdown Option (Cat DDO) ifite agaciro ka miliyoni 141 z'Amadolari, igamije gutuma igihugu kibona amafaranga yihuse igihe habaye ibiza.
Mu rwego rwo gukomeza gukumira ibiza, Guverinoma yatangaje ko mu mwaka wa 2026 yimuriye imiryango 4785 yari ituye ahantu hashobora gushyira ubuzima bwabo mu kaga. Hari kandi indi miryango 5095 yangirijwe amazu n'ibiza mu 2023 yamaze gutuzwa ahandi.
Hashyizwe kandi imirindankuba mu bice bya Rutsiro na Ngororero, hubakwa ahantu 14 hagenewe kwakirira abimuwe n'ibiza ndetse n'ububiko bw'ibikoresho by'ubutabazi muri Kigali, Musanze, Kayonza na Karongi.
Abantu bagera ku 4000 bamaze guhabwa amahugurwa ajyanye no kwitegura ibiza, mu gihe Ikigo cy'Igihugu gishinzwe ubutabazi gikora amasaha 24 kuri 24 kugira ngo gikurikirane ibibazo byihutirwa.
INDI NKURU WASOMA : SKOL yasinyanye amasezerano adasanzwe na BK Pro League
Raporo yagaragaje ko mu Rwanda hari ibikorwa remezo 18417 bishobora kwibasirwa n'ibiza, birimo insengero 4125, amashuri 3270 n'amasoko n'inyubako z'ubucuruzi 2.186.
Hagati ya 2022 na 2026, ibiza byahitanye abantu 899, bikomeretsa abarenga 1.800. Inkuba ni zo zateje impfu nyinshi zigera kuri 318, zikurikirwa n'impanuka zo mu birombe, imyuzure n'inkangu.
Ibitekerezo