Ubukungu bw'u Bushinwa bwongeye kudohoka
Ubukungu bw'u Bushinwa bwagaragaje kongera kudohoka mu gihembwe cya kabiri cy'umwaka wa 2026, aho izamuka ryabwo ryageze kuri 4.3%, rikaba riri munsi y'igipimo Guverinoma y'iki gihugu yari yihaye, nubwo ibicuruzwa byoherezwa mu mahanga byakomeje kwiyongera.
Imibare yatangajwe n'inzego z'ibarurishamibare mu Bushinwa igaragaza ko hagati ya Mata na Kamena 2026, ubukungu bwazamutse ku kigero cya 4.3%, buvuye kuri 5% bwari bwazamutseho mu gihembwe cya mbere cy'uyu mwaka.
Abasesenguzi bavuga ko iri gabanuka ryatewe ahanini n'igabanuka ry'ubushobozi bw'Abashinwa bwo kugura ibicuruzwa imbere mu gihugu, ndetse n'ingaruka z'intambara ya Iran yazamuye ibiciro bya peteroli n'ibindi bikenerwa mu nganda.
Nubwo ubukungu bwadindije umuvuduko, u Bushinwa bwakomeje kwitwara neza mu rwego rw'ibyoherezwa mu mahanga. Imibare ya Guverinoma igaragaza ko muri Kamena 2026 ibyoherezwaga hanze byiyongereyeho 27% ugereranyije n'ukwezi nk'uku k'umwaka ushize.
Iri zamuka ryaturutse cyane ku bwiyongere bw'ibikenerwa ku isi birimo ibyuma biyobora amashanyarazi (semiconductors) bikoreshwa mu ikoranabuhanga ry'ubwenge buhangano (AI), ndetse n'imodoka zikoresha amashanyarazi, aho u Bushinwa bwohereje hanze imodoka zirenga miliyoni imwe mu kwezi kumwe ku nshuro ya mbere.
INDI NKURU WASOMA :Byiringiro Patrick wari umaze gusinyira APR VC yitabye Imana
Icyakora, imbere mu gihugu ibibazo biracyakomeje. Isoko ry'imiturire rikomeje guhura n'igabanuka ry'ibiciro by'inzu nshya, nubwo muri Kamena byagabanutseho 0.1% gusa, mu gihe abaturage benshi bagikomeje kugabanya ibyo bagura.
Nubwo igurishwa ry'ibicuruzwa by'ubucuruzi bworoheje ryazamutseho 1% muri Kamena, abasesenguzi bavuga ko rigikiri hasi ugereranyije n'ibyari byitezwe.
Ibitekerezo