Abagabo batatu bahamwe n’icyaha cyo kwica ba mukerarugendo batatu

Abahamijwe icyo cyaha ni Jesús Gerardo, Irineo Francisco na Ángel Jesús. Amazina yabo yose ntiyashyizwe ahagaragara kubera impamvu z’amategeko. Biteganyijwe ko bazakatirwa ibihano, aho bashobora gufungwa burundu.

Abishwe ni Jake Robinson na Callum Robinson, bakomokaga muri Australia, hamwe na Carter Rhoad wo muri Leta Zunze Ubumwe za Amerika. Bari bagiye guserefinga mu gace ka Baja California, mu majyaruguru ashyira uburengerazuba bwa Mexique.

Mu iburanisha ryamaze ukwezi, urukiko rwumvise ko abo bagabo bishwe mu gikorwa cy’ubujura cyari kigamije kubambura imodoka yabo, bari ahantu hatuwe n’abantu bake hafi y’inyanja. Imibiri yabo yaje kuboneka mu iriba, bafite ibikomere by’amasasu mu mitwe.

Debra Robinson, nyina w’abo bavandimwe, yabwiye urukiko ko urupfu rw’abahungu be rwabambuye ejo hazaza bari barabateganyirije. Se, Martin Robinson, na we yavuze ko kubura umwana bibabaza cyane, ariko ko umuryango we wahuye n’akababaro gakomeye ko kubura abahungu babiri.

Imiryango y’abishwe yakurikiranye iburanisha mu mujyi wa Ensenada, aho ibyabaye byatunguranye abaturage n’abakerarugendo, kuko ako gace kari kazwi nk’ahantu hakundwa n’abaserefinga.

INDI NKURU WASOMA : Ingabire Victoire yasabiwe gushinjurwa n'Ubushinjacyaha

Ubushinjacyaha bwari bwasabiye buri umwe mu baregwa igifungo cy’imyaka 150. Mu rubanza rutandukanye rwabaye mu Ugushyingo 2025, umugore wari umukunzi wa Jesús Gerardo, uzwi ku izina rya “El Kekas”, yakatiwe imyaka 20 y’igifungo nyuma yo kwemera uruhare rwe mu bujura.