Ingabire Victoire yasabiwe gushinjurwa n'Ubushinjacyaha

Ibi byagarutsweho ku wa 8 Ukwakira 2026, ubwo Me Bruce Bikotwa yasobanuraga impamvu ikiganiro Ingabire yagiranye na Ntamuhanga Cassien muri Gicurasi 2026, ku myitozo ya gisirikare mu Burundi, kidakwiye gufatwa nk’ikimenyetso gihamya ibyaha aregwa.

Me Bikotwa yavuze ko muri icyo kiganiro nta kimenyetso kigaragaza ko Ingabire yagize uruhare mu gutegura ibikorwa byavugiwemo, ahubwo ko cyarangiye avuga ko atari ahari ku buryo yabigiramo uruhare.

Yavuze kandi ko kuba abanyapolitiki baganira ku bibazo bya politiki bidahita bivuga ko bakoze icyaha, asaba Ubushinjacyaha kugaragaza isano iri hagati y’icyo kiganiro n’ibyaha Ingabire aregwa.

Ati: “Bwagombye no kurenganura Ingabire Victoire. Ubushinjacyaha ni we avoka wa mbere wa Ingabire, twe tukaza tumufasha mu bijyanye n’uburenganzira bwe.”

Basabye gusuzuma ibimenyetso

Ku wa 6 Ukwakira, Me Gatera Gashabana na we yari yavuze ko Ubushinjacyaha bwirengagije inshingano zabwo zo gushaka ibimenyetso bishobora kurenganura Ingabire.

INDI NKURU WASOMA : Zion Temple yasabye imbabazi ku magambo yavuzwe ku baforomo n’ababyaza

Yagaragaje ko mu birego byatanzwe hagarutswe ku cyemezo cy’Urukiko rw’Ikirenga rwahamije Ingabire ibyaha, ariko ntihagaragazwe uko urubanza rwe rwaje gusuzumwa n’Urukiko rwa Afurika rushinzwe Uburenganzira bwa Muntu n’Abaturage.

Ku munsi wa gatandatu w’urubanza, Ingabire na we yavuze ko Ubushinjacyaha bwamugaragaje nk’uwakoze ibyaha, aho gusuzuma ibimenyetso byose birimo n’ibishobora kumushinjura.