Abantu 27 bishwe mu bitero bibiri muri Afurika y’Epfo
Abantu 27 bishwe mu bitero bibiri bitandukanye byo kurasana byabereye muri Afurika y’Epfo mu masaha make, mu gihe iki gihugu gikomeje guhangana n’ubugizi bwa nabi bukoresheje intwaro.
Abantu 17, barimo abagabo 13 n’abagore bane, bishwe ku mugoroba wo ku wa Gatandatu ubwo abantu umunani bitwaje imbunda bateraga akabari kari hafi y’Umujyi wa Johannesburg. Abandi 15 barakomereka.
Abapolisi bavuze ko abagabye igitero babanje kurasa abantu bari hanze y’akabari, nyuma bakinjiramo bakomeza kurasa. Batwitse kandi imodoka ebyiri mbere yo guhunga.
Mu masaha ya kare yo ku Cyumweru, abandi bantu 10 bishwe hanze y’ahantu hakorerwa imyidagaduro mu gace gatuwe cyane hafi ya Cape Town. Abandi 11 barakomereka. Batanu bapfiriye aho igitero cyabereye, mu gihe abandi batanu bapfiriye mu bitaro.
INDI NKURU WASOMA :Iran yasezeranyije gufungura umuhanda wa Hormuz
Kugeza ku Cyumweru mu gitondo, nta muntu wari wafatwa ku bw’ibi bitero byombi, kandi polisi yari itaratangaza impamvu yabyo.
Maj Gen Fred Kekana, umuyobozi mukuru wa polisi muri ako gace, yavuze ko igitero cyabereye hafi ya Johannesburg gishobora kuba gifitanye isano no kwihorera ku kindi gitero cyabaye mu kwezi gushize.
Ibi bitero bibaye nyuma y’iminsi mike abandi bantu 11 bishwe i Durban, aho abagizi ba nabi bitwaje imbunda bateye urugo.
Ibitekerezo