Abikorera bo mu Burasirazuba batangiye gushora imari ku Isoko ry’Imari n’Imigaban
Bamwe mu bikorera bo mu Ntara y’Iburasirazuba bahise bashora amafaranga ku Isoko ry’Imari n’Imigabane ry’u Rwanda nyuma yo gusobanurirwa uko ryabafasha kubona igishoro, kwagura ubucuruzi no kwizigamira byunguka.
Ibi byabaye ku wa Gatatu, tariki ya 11 Ugushyingo 2026, mu bukangurambaga bwateguwe n’Urwego rw’u Rwanda Rugenzura Isoko ry’Imari n’Imigabane (CMA), ku bufatanye n’Urugaga rw’Abikorera (PSF) n’abandi bafatanyabikorwa, bwabereye mu Karere ka Nyagatare.
Muri ubu bukangurambaga, abikorera basobanuriwe ko iri soko ritagamije gusa gufasha ibigo kubona igishoro, ahubwo ko rinatanga amahirwe yo gushora amafaranga no kuyabyaza inyungu.
Dr. James Ndahiro, wari uhagarariye Umuyobozi Mukuru wa CMA, yavuze ko ibigo bifite imiyoborere myiza n’imicungire iboneye y’imari bifite amahirwe yo kwifashisha iri soko mu gushaka igishoro.
Yashishikarije abikorera kurikoresha mu kwagura ibikorwa no guteganyiriza ejo hazaza.
Umuyobozi Mukuru wa RNIT Iterambere Fund, Gatera Sebagabo Jonathan, na we yasabye abikorera kwimakaza umuco wo kuzigama, ashimangira ko amafaranga adakwiye kubikwa gusa, ahubwo ko akwiye no gushorwa mu buryo bushobora kubyara inyungu.
Nyuma y'ibiganiro, bamwe mu bitabiriye bahise bashora amafaranga arimo miliyoni 5 Frw, abandi miliyoni imwe n'abari munsi yayo.
INDI NKURU WASOMA : Minisitiri w’Intebe Nsengiyumva yageze muri Türkiye
Gatsinzi Justine, umwe mu bitabiriye, yavuze ko yari asanzwe yumva iby’iri soko ariko atarasobanukirwa imikorere yaryo. Yavuze ko ateganya no gukangurira abandi borozi kwishyira hamwe bagashora imari.
Guverineri w’Intara y’Iburasirazuba, Pudence Rubingisa, yavuze ko ubuyobozi buzafatanya n’abikorera gukoresha aya mahirwe mu guteza imbere ibikorwa byabo.
Isoko ry’Imari n’Imigabane ry’u Rwanda rimaze imyaka 15 rikora, rikaba rimaze gushorwamo amafaranga arenga miliyari 6.000 Frw, rikaba rifite abashoramari barenga ibihumbi 350.
Ibitekerezo