Alonso yahakanye ko Chelsea ishobora gutiza Estêvão muri Mutarama

Uyu mukinnyi w’imyaka 19 yigaragaje cyane mu mwaka ushize nyuma yo kuva muri Palmeiras yo muri Brazil, ariko muri uyu mwaka amaze gukina iminota 172 gusa, kandi ntarongera kubanza mu kibuga mu mikino ya Premier League.

Ku wa Gatatu, Estêvão ntiyahawe umwanya wo gukina ubwo Chelsea yasezererwaga na Liverpool muri Carabao Cup, nyuma yo gutsindirwa kuri Anfield.

Nyuma y’uwo mukino, Alonso yavuze ko uyu munya-Brazil akiri mu gihe cyo kumenyera imbaraga n’imiterere y’umupira w’amaguru wo mu Bwongereza.

Abajijwe niba bishoboka ko yatizwa mu yindi kipe muri Mutarama, Alonso yagize ati: “Nta biganiro byigeze bibaho ku bijyanye no kumutiza.”

Yakomeje avuga ko igihembwe kigifite imikino myinshi, bityo Estêvão na we azabona amahirwe yo gukina.

Ati: “Igihembwe ni kirekire kandi buri wese azabona igihe cye. Ni urugendo rwo kumenyera ku ikipe, kuri Estêvão no kuri njye. Nizeye ko azabona imikino ye n’iminota yo gukina.”

INDI NKURU WASOMA : Uruganda rw’imyenda ruzatwara miliyari 5 Frw rugiye kubakwa

Alonso avuga ko imvune atakiyifite

Estêvão yari mu bakinnyi bake ba Chelsea bishimiwe n’abafana mu mwaka ushize, aho yatsinze ibitego by’ingenzi birimo icyatsinzwe mu minota ya nyuma ikipe ye itsinda Liverpool kuri Stamford Bridge mu Ukwakira.

Yanigaragaje mu mukino Chelsea yatsinzemo Barcelona ibitego 3-0 mu Ugushyingo, atsinda igitego cyiza nyuma yo gucenga abakinnyi b’iyi kipe yo muri Espagne.

Icyakora, urugendo rwe rwahagaritswe n’imvune yo mu itako yagize muri Mata, bituma asiba imikino yakurikiyeho.

Alonso yavuze ko ubu yamaze gukira kandi ko imyitwarire ye ari myiza, ashimangira ko ikibazo gisigaye ari ukubona igihe gikwiye cyo kumukinisha.

Chelsea izakira Manchester United ku wa Gatandatu, ishaka kwisubiraho nyuma yo gutsindwa na Tottenham mu mukino uheruka. Iyi kipe izakina idafite Maxence Lacroix, ufite imvune izatuma adakina kugeza nyuma y’ikiruhuko cy’imikino y’amakipe y’ibihugu yo mu Ugushyingo.