Amavubi yasesekaye i Praia
Ikipe y’Igihugu y’u Rwanda, Amavubi, yageze i Praia muri Cap-Vert aho yitegura gukina umukino wa kabiri wo gushaka itike y’Igikombe cya Afurika cya 2027.
Amavubi yageze muri uyu Mujyi ku wa Gatandatu, tariki ya 26 Nzeri 2026, nyuma y’urugendo rurerure rwanyuze i Nairobi muri Kenya, Abidjan muri Côte d’Ivoire na Dakar muri Sénégal.
Abakinnyi, abatoza n’abandi baherekeje ikipe bahise berekeza kuri VIP Praia Hotel, aho babanje kuruhukira mbere yo kwakirwa na Ambasaderi w’u Rwanda muri Sénégal, akaba ari na we uhagarariye u Rwanda muri Cap-Vert, Bizimana Festus.
Mu butumwa yahaye ikipe, Ambasaderi Bizimana yasabye Amavubi gukomeza imyitwarire myiza no guharanira intsinzi, ashimangira ko gutsinda uyu mukino byaba bifite igisobanuro gikomeye ku Banyarwanda.
Yabijeje kandi abakinnyi n’abatoza ko azakomeza kubashyigikira uko ashoboye mu gihe bitegura uyu mukino.
INDI NKURU WASOMA : Hafi 50 % by’abafite umuvuduko ukabije w’amaraso mu Rwanda ntibabizi
Amavubi atoza Stephen Constantine yajyanye abakinnyi 24 bazitabira uyu mukino uteganyijwe ku wa Kabiri, tariki ya 29 Nzeri 2026, kuri Estádio Nacional de Cabo Verde.
Uyu mukino uzaba ukurikira uwo Amavubi yatangiye neza muri aya majonjora, ubwo yatsindaga Liberia ibitego 3-1 kuri Stade Amahoro.
U Rwanda ruzaba rushaka gukomeza kwiyubakira umwanya mwiza mu itsinda, mu gihe Cap-Vert yo izaba iri imbere y’abafana bayo ishaka amanota yayo.
Ibitekerezo