Ba rushimusi barenga 10 bafatiwe mu Kiyaga cya Kivu
Abantu barenga 10 bakoraga uburobyi butemewe mu Kiyaga cya Kivu mu Karere ka Nyamasheke bafashwe mu mezi abiri uburobyi bwari bwahagaritswe, hanafatwa imitego irenga 100 ikoreshwa mu burobyi butemewe.
Ibi byatangajwe na Mugenzi Gérard, uyobora Ihuriro ry’Amakoperative y’Abarobyi mu Karere ka Nyamasheke, ubwo hatangizwaga umwaka mushya w’uburobyi ku wa Gatanu tariki ya 2 Ukwakira 2026.
Mugenzi yavuze ko ibikorwa byo kurwanya ba rushimusi byagize uruhare mu kongera umusaruro w’isambaza, kuko aborozi bahawe igihe cyo kororoka mu gihe ikiyaga cyari gifunze.
Yavuze ko abafashwe bakoresheje imitego itandukanye, irimo iya Kaningini n’ibipurizo, ifata n’isambaza nto zitaragera ku kigero cyo kuroberwa.
Ati: “Abo twafashe barenga 10 twabashyikirije ubuyobozi kugira ngo bujye kubigisha.”
Yongeyeho ko gufata ba rushimusi bose bitoroshye, kuko abagenzura ikiyaga baba mu bwato burimo abantu batanu, mu gihe abakekwaho uburobyi butemewe bashobora gutatana cyangwa guhunga.
Ati: “Hari abo twafashe barenga icumi, imitego bakoreshaga twafashe irenga ijana.”
INDI NKURU WASOMA : FERWAFA yavuze ku by'amakipe y'icyiciro cya kabiri
Mugenzi kandi yavuze ko hari abakoresha imitego ikozwe muri supaneti, ishobora kwangiza amagi, utwana tw’isambaza ndetse n’ahororokera.
Nyamasheke iri mu turere dutanu two mu Ntara y’Iburengerazuba dukora ku Kiyaga cya Kivu. Ihuriro ry’Amakoperative y’Abarobyi muri aka karere rigizwe n’amakoperative arindwi afite abanyamuryango bagera kuri 400.
Ibitekerezo