Carrick ari mu mazi abira nyuma yo kwandagazwa na Como
Umutoza wa Manchester United, Michael Carrick, ari mu bihe bikomeye nyuma yo gutsindirwa na Como ibitego 4-1 mu mukino wa UEFA Champions League, ibyongera igitutu ku hazaza he muri iyi kipe yo mu Bwongereza.
Ikinyamakuru The Sun cyatangaje ko uku gutsindwa gushobora kuba ikimenyetso kibi kuri Carrick, cyane ko bihuje n’amanota Ole Gunnar Solskjaer yatsindiweho mu mukino we wa nyuma atoza Manchester United mbere yo kwirukanwa mu Ugushyingo 2021.
Solskjaer yatsinzwe na Watford ibitego 4-1, nyuma yaho akazi ke karahagarikwa. Carrick, wahoze akinana na we muri Manchester United, yari ari kuri uwo mukino, ndetse bukeye ahabwa inshingano zo gutoza iyi kipe by’agateganyo.
Manchester United iri mu bihe bitoroshye muri uyu mwaka w’imikino. Mu marushanwa yose imaze gutsindamo imikino ibiri gusa, yasezerewe na Brighton mu gikombe cya League Cup, iri ku mwanya wa 13 muri Premier League no ku wa 20 ku rutonde rwa Champions League.
INDI NKURU WASOMA : Perezida Kagame yakiriye Minisitiri w’u Budage
Nyuma yo gutsindwa na Como, Carrick yagiye kwegera abafana bari bagiye gushyigikira ikipe mu Butaliyani, mu gihe igitutu gikomeje kwiyongera ku buyobozi bwe.
Nubwo ibyo byose byongera ibibazo ku hazaza he, nta cyemezo cyo kumwirukana cyatangajwe mu makuru yatangajwe n’iki kinyamakuru. Uko ikipe izitwara mu mikino iri imbere bishobora kugira uruhare mu cyemezo cy’ubuyobozi.
Ibitekerezo