Carrick yahakanye ko amagambo ya MartĂnez yahungabanyije Manchester United
Umutoza wa Manchester United, Michael Carrick, yatangaje ko amakimbirane akomoka ku magambo ya Lisandro MartĂnez atahungabanyije umwuka uri mu ikipe, ashimangira ko abakinnyi bakomeje kwitegura imikino bafite intego imwe.
Mu kiganiro n’abanyamakuru cyabaye ku wa 16 Ukwakira 2026, Carrick yavuze ko ikipe imeze neza, nubwo amagambo ya MartĂnez amaze iminsi avugisha benshi nyuma yo gutsindwa na AtlĂ©tico Madrid ibitego 2-0 muri UEFA Champions League.
MartĂnez, ukomoka muri Argentine, yari yanenze ubuyobozi bwa Manchester United, ibintu byatumye Wayne Rooney, wahoze ayikinira, amwihanangiriza ko imyitwarire nk’iyo ishobora guteza amacakubiri mu rwambariro. Abahoze ari ba kapiteni b’iyi kipe, Roy Keane na Gary Neville, na bo bagize icyo bavuga kuri iki kibazo.
Uyu myugariro yasabye imbabazi ku gihe yatangarijeho amagambo ye, ariko ntiyisubiraho ku byo yavuze.
Carrick yavuze ko abantu batandukanye bashobora kugira icyo bavuga ku ikipe, ariko ko ibyo bitavuze ko baba bazi neza ibiyiberamo imbere.
Yagize ati: “Hari abantu benshi bavuga ibintu bitandukanye, baba barakinnye umupira cyangwa batarawukinnye, ariko ibyo ntibivuze ko basobanukiwe ibibera hano. Kuba abantu bavuga hanze y’ikipe ntibivuze ko ibyo bavuga ari ukuri. Njye ndababwira ukuri.”
Yakomeje avuga ko abakinnyi bari mu bihe byiza kandi ko umwuka uri mu ikipe ukomeje kuba mwiza, nubwo rimwe na rimwe amarangamutima ashobora gutuma umuntu avuga ibidakwiye kuvugirwa mu gihe runaka.
INDI NKURU WASOMA :Uburusiya bushinja Ukraine kugaba igitero ku ruganda rutunganya peteroli
Carrick yanemeje ko MartĂnez azaba ari mu bakinnyi bazategurwa ku mukino wa shampiyona Manchester United izakinamo na Leeds United ku Cyumweru, tariki ya 18 Ukwakira 2026, kuri Elland Road.
Manchester United ikomeje gushaka kwiyubaka nyuma yo gutangira nabi shampiyona, aho yari imaze gutsinda umukino umwe gusa mu mikino itandatu ya mbere ya Premier League.
Ibitekerezo