Gicumbi: Hubatswe ibikorwaremezo byatwaye asaga miliyari 7,4 Frw
Akarere ka Gicumbi katashye ibikorwaremezo by’uburezi byatwaye asaga miliyari 7,4 Frw, birimo ibyumba by’amashuri, amacumbi y’abanyeshuri, laboratwari n’ibyumba by’isuku byihariye ku bakobwa, mu rwego rwo kunoza imyigire no kugabanya imbogamizi abanyeshuri bahuraga na zo.
Ibi bikorwaremezo byubatswe ku nkunga ya Banki y’Isi, ku bufatanye na Minisiteri y’Uburezi, muri gahunda ya Quality Basic Education for Human Capital Development Project, yatangiye mu 2020.
Byuzuye birimo ibyumba by’amashuri 963, ibigo by’amashuri bishya 25, amacumbi y’abanyeshuri, amasomero na laboratwari zigezweho. Iyi gahunda igamije kuzamura ireme ry’uburezi, kongerera ubushobozi abarimu no gufasha abana gukomeza kwiga ahantu hatekanye kandi haboneye.
Abarezi bavuga ko ibi bikorwaremezo bibafasha kunoza imyigire y’abana, mu gihe ibyumba by’isuku by’abakobwa bigira uruhare mu kubungabunga isuku no koroshya imibereho yabo ku ishuri.
Umuyobozi w’Akarere ka Gicumbi, Emmanuel Nzabonimpa, yavuze ko ibi bikorwaremezo byafashije abana bigaga kure kubona amashuri abegereye, bigabanya ubucucike n’imbogamizi zijyanye n’amacumbi.
Yagize ati: “Haba ubucucike mu mashuri, haba izo ngendo zakorwaga n’abana bajya kwiga, n’abatari bafite aho barara, abo bose barasubijwe.”
INDI NKURU WASOMA : Umunyeshuri wa UR atwara imizigo ku igare kugira ngo abone ikimutunga
Umuyobozi Mukuru wungirije w’Ikigo Gishinzwe Guteza Imbere Uburezi (REB), Mutezinka Flora, yavuze ko kubaka ibi bikorwaremezo ari imwe mu nzira zo kugaragaza umusaruro w’ubufatanye n’abafatanyabikorwa.
MINEDUC igaragaza ko mu 2025 hubatswe ibyumba by’amashuri birenga 11.000 n’ubwiherero 14.680 mu gihugu hose, hagamijwe kugabanya ubucucike no korohereza abana kubona uburezi, cyane cyane mu cyaro.
Ibitekerezo