Umunyeshuri wa UR atwara imizigo ku igare kugira ngo abone ikimutunga
Ishimwe Théogène, umunyeshuri w’imyaka 21 muri Kaminuza y’u Rwanda, yahisemo gutwara imizigo ku igare kugira ngo abone amafaranga amufasha mu mibereho ye, nubwo bamwe mu rungano rwe babona ko ako kazi kadakwiriye umuntu wiga muri kaminuza.
Ishimwe, wiga mu mwaka wa kabiri mu ishami ry’Ibaruramari n’Imari (Accounting and Finance), akomoka mu Karere ka Nyaruguru. Ni imfura mu muryango w’abana batanu.
Mu kiganiro na IGIHE, yavuze ko inguzanyo ahabwa yo kwiga itamuhagije ngo yishyure ibikenerwa byose, mu gihe ababyeyi be na bo bafite ubushobozi buke.
Ati: “Buruse baduha ni ibihumbi 80 Frw mu mezi abiri, kandi ubuzima bukomeza buhenda. Wareba kurya, kwishyura inzu, ukabona ntabwo byakoroha.”
Yegereye inshuti ye yakoraga mu bubiko bw’inzoga, atangira kugeza ku bakiliya amakesi y’inzoga ku igare, ahembwa bitewe n’imizigo atwaye. Akodesha igare ku mafaranga 3.500 Frw buri cyumweru, akaba amaze umwaka akora uwo murimo.
INDI NKURU WASOMA : Uburusiya bushinja Ukraine kugaba igitero ku ruganda rutunganya peteroli
Avuga ko mu mpera z’icyumweru ashobora kubona 10.000 Frw, mu gihe mu minsi y’imibyizi amafaranga agabanuka bitewe n’amasomo.
Amafaranga akorera amufasha kubona ibiribwa, imyambaro n’ibikoresho by’isuku, ndetse akanazigama make yo kumufasha igihe inguzanyo yo kwiga itinze. Anunganira barumuna be mu gihe babikeneye.
Ntiyemera ko umurimo usuzugurwa
Nubwo yishimira ibyo akora, Ishimwe ahura n’imbogamizi zirimo impanuka zishobora kumutera igihombo igihe inzoga atwaye zimenetse. Avuga kandi ko izamuka ry’ibiciro ryagabanyije abakiliya.
Ibyo ntibimuca intege, kuko yemera ko nta murimo ukwiye gusuzugurwa igihe ukorwa mu bunyangamugayo.
Mu gihe kizaza, yifuza kubona igishoro agatangiza ubucuruzi bwe, akanashyiraho serivisi yo kugeza ibicuruzwa ku bakiliya.
Ibitekerezo