Ibiciro bya peteroli byarenze ku madolari 100 kubera intambara ya Amerika na Iran

Ku wa Gatatu, peteroli yo mu bwoko bwa Brent, ikoreshwa nk’igipimo mpuzamahanga cy’ibiciro bya peteroli, yazamutse irenga amadolari 100 ku ngunguru.

 Ibi byatewe ahanini n’impungenge z’uko ibitero bishya bishobora gukomeza guhungabanya itangwa rya peteroli ku isoko mpuzamahanga.

Ku munsi wabanje, igisirikare cya Amerika cyatangaje ko cyarashe kandi kigashwanyuza ubwato butanu butwara peteroli ya Iran, mu rwego rwo gusubiza ibitero bya misile byari byibasiye ubwato bw’intambara bw’Amerika.

Iran na yo yasubije ibitero ku bwato bw’Amerika ndetse no ku birindiro byayo muri Jordan, bituma impungenge z’uko intambara ishobora gukomeza kwaguka ziyongera.

INDI NKURU WASOMA : Gatsibo: Abaturage barasaba amazi meza hafi yabo

Muri Saudi Arabia na ho ibintu byarushijeho kuba bibi. Umutwe wa Houthi wo muri Yemen ushyigikiwe na Iran wagabye ibitero ku bikorwa remezo by’ingufu, bituma ahantu hakorerwa ibikorwa bya peteroli hafatwa n’inkongi y’umuriro yangije byinshi.

Brent yazamutseho hafi 40% ugereranyije n’ibiciro yariho mbere y’intambara, nubwo ikiri munsi y’amadolari 120 ku ngunguru yagezeho mu ntangiriro z’iyi ntambara.

Peterseli yo mu bwoko bwa West Texas Intermediate (WTI), ari na yo ikoreshwa nk’igipimo muri Amerika, na yo yazamutse igera hafi ku madolari 95 ku ngunguru.

Izamuka ry’ibiciro ririmo guteza impungenge ku bukungu, cyane cyane ku biciro bya lisansi. Muri Amerika, litiro imwe ya lisansi yari igeze ku mpuzandengo y’amadolari 4.22, igiciro cyo hejuru kuva mu ntangiriro za Kamena.

Impungenge zikomeye zishingiye no ku Nyanja ya Hormuz, inzira y’ingenzi inyuzwamo hafi kimwe cya gatanu cya peteroli ikoreshwa ku isi. Imvururu muri ako karere zishobora gutuma ubwikorezi bw’ingufu bukomeza kugorana, bityo ibiciro bikongera kuzamuka.

Nubwo Perezida Donald Trump yavuze ko ibiciro bya peteroli bishobora kuzamanuka cyane intambara nirangira, kugeza ubu nta kimenyetso gihamya ko imirwano iri hafi kurangira.