Inkongi y’umuriro yangije burundu icumbi ry’abanyeshuri muri TSS ya Musamvu
Inkongi y’umuriro yibasiye ishuri ry’imyuga n’ubumenyingiro rya Musamvu (Musamvu TSS), riherereye mu Murenge wa Kibungo, mu Karere ka Ngoma, isenya burundu icumbi ry’abanyeshuri, irangiza ibitanda 72 n’ibindi bikoresho byabo bwite.
Iyi nkongi yabaye hagati ya saa tanu na saa tanu n’iminota 20 za mu gitondo, kuri uyu munsi, ariko nta muntu wahasize ubuzima cyangwa ngo akomerekere muri iyo mpanuka, nk’uko Polisi yabitangaje.
Umuvugizi wa Polisi mu Ntara y’Iburasirazuba, SSP Hamdun Twizeyimana, yabwiye ikinyamakuru The New Times ko amakuru y’ibanze agaragaza ko ibikorwa byo gusudira ibyuma byakorwaga mu kigo bishobora kuba byaratumye umuriro utangira.
Yasobanuye ko ibishashi byaturutse mu gusudira bishobora kuba byarageze ku myenda n’imifariso byari mu icumbi, bigakurura inkongi.
Polisi, ifatanyije n’abaturage, yashoboye kuzimya umuriro no gukumira ko wakwira mu bindi bice by’ishuri. Icyakora, ibitanda 72, imifariso n’ibindi banyeshuri bari babitse muri iryo cumbi byahiye.
INDI NKURU WASOMA : Hagiye gutangizwa amasomo yo gukanika indege
Polisi yatangaje ko iperereza rigikomeje kugira ngo hamenyekane neza icyateye iyi nkongi.
SSP Twizeyimana yasabye amashuri n’ibindi bigo kongera ingamba zo gukumira inkongi, by’umwihariko kugira ibyuma bizimya umuriro byujuje ubuziranenge kandi bikora neza, ndetse no guhugura ababikoresha.
Ibitekerezo