Kamonyi: Ukekwaho ubujura yapfuye aguye ku gipangu
Umusore witwa Biziyaremye, w’imyaka 19, yapfuye aguye ku gipangu cy’urugo rwo mu Murenge wa Ngamba, mu Karere ka Kamonyi, aho bikekwa ko yari yagiye kwiba ari kumwe n’abandi.
Ibi byabaye mu gitondo cyo ku wa 26 Ukwakira 2026, ahagana saa kumi n’imwe, mu Mudugudu wa Musenyi, Akagari ka Kabuga.
Amakuru y’ibanze agaragaza ko Biziyaremye n’abo bari kumwe bakekwaho kuba baragiye gushaka amafaranga y’umuturage wari uherutse kugurisha inka.
Bikekwa ko bagerageje kumena urugi kugira ngo binjire mu nzu, ariko nyir’urugo arabumva, bituma batangira guhunga. Mu gihe cyo guhunga, Biziyaremye yagerageje kurira igipangu, aragwa akubita umutwe hasi, ahita apfa.
Umunyamabanga Nshingwabikorwa w’Umurenge wa Ngamba, Mudahemuka Jean Damascène, yavuze ko inzego z’ubuyobozi n’iz’umutekano zahise zijya ahabereye ibyago zikimara kubimenya.
Yagize ati: “Ni byo, tumaze kumenya amakuru, inzego z’umutekano zatangiye iperereza.”
INDI NKURU WASOMA : Abarimu bisuzumye nyuma y’imitsindishirize itari myiza
Biziyaremye yari asanzwe atuye mu Mudugudu wa Fukwe, Akagari ka Kabuga, mu Murenge wa Ngamba. Bamwe mu bari bamuzi bavuga ko yari yaragiye akekwaho ibikorwa by’ubujura mu bihe bitandukanye.
Icyakora, amakuru arambuye ku byabaye n’uruhare rw’abandi bakekwaho kuba bari kumwe na we ntarashyirwa ahagaragara, mu gihe iperereza rikomeje.
Ibitekerezo