Lisandro Martinez yanenze ubuyobozi bwa Manchester United
Myugariro wa Manchester United, Lisandro Martinez, yanenze ubuyobozi bw’iyi kipe kubera kudakomeza kuyishoramo imbaraga mu kugura abakinnyi, nubwo umwaka ushize yasoje shampiyona yujuje ibisabwa byo gusubira muri UEFA Champions League.
Ibi yabitangaje nyuma y’uko United itsinzwe na Atlético Madrid ibitego 2-0 ku wa Kabiri, ikuzuza imikino itanu idatsinda.
Mu kiganiro yagiranye na Amazon Prime, Martinez yavuze ko ikipe yakoze ibishoboka byose mu mwaka ushize kugira ngo igere ku rwego rwo guhatana n’amakipe akomeye, bityo ko ubuyobozi bukwiye kongera ishoramari mu bakinnyi.
Ati: “Umwaka ushize twagize umwaka mwiza cyane, ubu turategereje byinshi ku buyobozi, turashaka abandi bakinnyi kugira ngo duhangane, kuko n’andi makipe ari kugura benshi.”
Yakomeje avuga ko nubwo abakinnyi na bo bagomba kongera imbaraga, bidahagije kureba umutoza n’abakinnyi gusa igihe ikipe ititwaye neza.
Ati: “Ntegereje ishoramari ryisumbuyeho. Ibyo ni ukuri 100%. Ntegereje byinshi ku muyobozi ushinzwe tekiniki, Jason Wilcox.”
Martinez yanenze umuco wo guhora bahindura abatoza, avuga ko hakwiye no kurebwa ibindi bibazo biri mu ikipe. Manchester United yasezereye Erik ten Hag mu Ukwakira 2024, inirukana Ruben Amorim muri Mutarama 2026.
Mu mpeshyi ishize, United yakoresheje miliyoni 155 z’amapawundi igura abakinnyi batatu bo hagati mu kibuga, ariko ntiyongeramo undi rutahizamu wo gufasha Benjamin Šeško cyangwa myugariro wo guhangana na Luke Shaw ku ruhande rw’ibumoso.
INDI NKURU WASOMA : Abakekwaho kwicisha umuntu bafunzwe by’agateganyo
United yasubiye muri Champions League nyuma yo kurangiza ku mwanya wa gatatu muri Premier League mu mwaka ushize, ariko umusaruro w’iyi sezon ntiwifashe neza. Iyi kipe imaze gutsinda imikino ibiri gusa muri icyenda yakinnye.
Ibitekerezo