Nduhungirehe yahagarariye Perezida Kagame mu nama yiga kuri Sudani y’Epfo
Minisitiri w’Ububanyi n’Amahanga n’Ubutwererane, Amb. Olivier Nduhungirehe, yahagarariye Perezida Paul Kagame mu nama y’Itsinda rya Afurika Yunze Ubumwe rishinzwe gukurikirana ikibazo cya Sudani y’Epfo, rizwi nka C5 Plus.
Iyi nama yabaye hifashishijwe ikoranabuhanga ku wa 29 Nzeri 2026, iyoborwa na Perezida wa Afurika y’Epfo, Cyril Ramaphosa. Yibanze ku isesengura ry’ibibazo bya politiki n’umutekano bikomeje kugaragara muri Sudani y’Epfo, ndetse n’ingamba zo gukomeza kwimakaza amahoro muri iki gihugu.
Mu ijambo rye, Nduhungirehe yongeye gushimangira ko u Rwanda rwiyemeje gukomeza kugira uruhare mu bikorwa bigamije kubungabunga amahoro n’umutekano muri Sudani y’Epfo.
Yavuze ko u Rwanda ruzakomeza gutanga umusanzu warwo binyuze mu bikorwa byo kubungabunga amahoro, ndetse no mu zindi gahunda n’imikoranire bigamije gushyigikira umutekano n’amahoro muri iki gihugu.
U Rwanda rufite uruhare mu bikorwa byo kubungabunga amahoro muri Sudani y’Epfo, aho rwanagaragaje ubushake bwo gukomeza gufatanya n’abandi mu gushakira umuti ibibazo bihangayikishije icyo gihugu.
C5 Plus ni Komite Yihariye yo ku Rwego Rukuru ya Afurika Yunze Ubumwe ishinzwe Sudani y’Epfo. Igizwe n’ibihugu byatoranyijwe kugira ngo bigire uruhare mu biganiro no mu ngamba zigamije gukemura ibibazo bya politiki, amahoro n’umutekano muri Sudani y’Epfo.
INDI NKURU WASOMA : Zuba Ray yizihije imyaka ibiri mu muziki
Iyi nama yabaye mu gihe Sudani y’Epfo ikomeje gushakirwa ibisubizo bya politiki n’umutekano, aho ibihugu bigize Afurika Yunze Ubumwe bikomeje gushimangira ubufatanye mu gushyigikira amahoro arambye.
Ibitekerezo