Perezida Kagame yitabiriye ibiganiro byihariye by’Abakuru b’Ibihugu muri CHOGM 2026
Perezida Paul Kagame yitabiriye ibiganiro byihariye by’abakuru b’ibihugu na za guverinoma bigize Umuryango w’Ibihugu bikoresha Icyongereza (Commonwealth), byabereye mu muhezo muri Antigua and Barbuda.
Ibi biganiro byabaye ku wa Kabiri, tariki ya 3 Ugushyingo 2026, byitabirwa na Minisitiri w’Intebe wa Antigua and Barbuda, Gaston Browne, n’abandi bayobozi bakuru bo muri uyu muryango.
Byibanze ku bibazo bihuriweho n’ibihugu bya Commonwealth, hagamijwe kungurana ibitekerezo no kurebera hamwe uburyo byafatanya mu kubishakira ibisubizo.
Ibiganiro nk’ibi biha abayobozi umwanya wo kuganira ku bibazo byugarije ibihugu byabo, bagahuza imbaraga mu guteza imbere ubufatanye.
Kagame yitabiriye ibi biganiro mu gihe muri Antigua and Barbuda hari kubera inama ya 28 y’Abakuru b’Ibihugu na za Guverinoma za Commonwealth (CHOGM), yatangiye ku wa 1 Ugushyingo ikazasozwa ku wa 4 Ugushyingo 2026.
Iyi nama ihuje abahagarariye ibihugu 56 bigize uyu muryango, barimo abakuru b’ibihugu na za guverinoma, ba minisitiri, abikorera, sosiyete sivile n’abahagarariye urubyiruko.
Yahurijwe ku nsanganyamatsiko igira iti “Kwihutisha ubufatanye n’ishoramari bigamije Commonwealth iteye imbere.” Ibiganiro byibanda ku kongera ubufatanye mu bucuruzi, ishoramari rirambye, guhangana n’imihindagurikire y’ibihe, ikoranabuhanga, uburinganire n’iterambere rirambye.
INDI NKURU WASOMA : Carrick yiteze guhangana na Roma nubwo Manchester United iri ahabi !
Uretse ibiganiro by’abakuru b’ibihugu, CHOGM 2026 inarimo amahuriro y’ubucuruzi, urubyiruko, abagore n’abaturage, agamije guha ijambo ibyiciro bitandukanye no kubigiramo uruhare mu cyerekezo cy’umuryango.
Ibitekerezo