Rwanda : Umusaruro w’inganda wazamutseho 7,2%
Umusaruro w’inganda mu Rwanda wazamutseho 7,2% muri Nzeri 2026 ugereranyije n’ukwezi nk’uku kwa 2025, ahanini bitewe n’izamuka ry’umusaruro w’amashanyarazi n’ibikorwa by’ubucukuzi bw’amabuye y’agaciro.
Imibare y’Ikigo cy’Igihugu cy’Ibarurishamibare (NISR) igaragaza ko iri zamuka rirenze impuzandengo ya 5,6% yari yagezweho mu mwaka wose, bikerekana ko ibikorwa byinshi by’inganda byagize umusaruro mwiza.
Mu nzego zose, amashanyarazi ni yo yihariye izamuka rikomeye, kuko umusaruro wayo wiyongereyeho 15,5%, mu gihe ubucukuzi bw’amabuye y’agaciro n’iy’inganda zo kuyatunganya byazamutseho 12%. Serivisi z’amazi n’imicungire y’imyanda byiyongereyeho 11,5%.
Ku rundi ruhande, urwego rw’inganda zitunganya ibicuruzwa rwazamutseho 0,4% gusa, nubwo ari rwo rufite uruhare runini mu musaruro w’inganda, rungana na 68,1%.
INDI NKURU WASOMA : Umukobwa utwite yarize yumvise igihano uwamuteye inda asabirwa
Iri zamuka ryatewe ahanini n’itunganywa ry’ibiribwa ryiyongereyeho 1,7%, ibinyobwa n’itabi byazamutseho 4,8%, ndetse n’ibikomoka ku byuma, imashini n’ibikoresho byiyongereyeho 6,1%.
Nubwo umusaruro w’inganda muri rusange wazamutseho 0,9% ugereranyije na Kanama 2026, urwego rutunganya ibicuruzwa rwagabanutseho 8,1%, naho amashanyarazi agabanukaho 4,4%. Ubucukuzi bw’amabuye y’agaciro bwo bwazamutseho 9,2% muri icyo gihe.
Ibitekerezo