Saudi Arabia yafunze umuyoboro ukomeye wa peteroli nyuma y’igitero cya drones

Uyu muyoboro uzwi nka East-West ufite uburebure bwa kilometero 1,200, ukaba ufasha Saudi Arabia kohereza peteroli ku masoko mpuzamahanga itanyuze mu Nyanja ya Hormuz. Raporo z’abasesenguzi n’abakurikiranira hafi ingendo z’amato zivuga ko unyuzwamo hagati ya 4% na 5% bya peteroli ikoreshwa ku isi.

Ku wa Gatanu, Saudi Arabia yatangaje ko yahagaritse imikorere y’uyu muyoboro nk’ingamba zo kwirinda, nyuma y’igitero cyateje ibyangiritse ndetse bamwe mu bantu barakomereka. Uko ibyangiritse bingana bikomeje gusuzumwa.

Iraq yemeye ko drones zagabye igitero zaturutse mu ntara ya Maysan, ihana imbibi na Iran. Guverinoma y’iki gihugu yahise ikura ku mirimo umuyobozi w’ingabo wari ushinzwe ibikorwa muri iyo ntara, inatangiza iperereza ku byabaye.

Saudi Arabia yavuze ko kugeza ubu idateganya gutera Iraq mu rwego rwo kwihorera, nyuma y’uko Minisitiri w’Intebe wa Iraq ayisabye kudafata ingamba nk’izo. Riyadh yavuze ko izashyigikira imbaraga za Baghdad mu gukumira ibitero byaturuka ku butaka bwa Iraq bigakorerwa ibihugu bituranye.

Icyakora, Saudi Arabia yavuze ko ifite uburenganzira bwo gufata ingamba zose zarinda umutekano n’ubusugire bwayo, ibikorwa remezo by’ingenzi ndetse n’abaturage n’abatuye muri iki gihugu.

INDI NKURU WASOMA : Ibiciro bya peteroli byarenze ku madolari 100 kubera intambara ya Amerika na Iran

Inama y’Ubutwererane bw’Ibihugu byo mu Kigobe (GCC) yamaganye icyo gitero, ivuga ko ari ukongera umwuka mubi kandi ko kibangamiye umutekano wa Saudi Arabia n’ibikorwa remezo byayo by’ingenzi.

Iki gitero kibaye mu gihe abarwanyi b’Abahouthi bafashwa na Iran bakomeje kwagura ibirindiro muri Yemen, aho bavuga ko bafite ububasha ku bice byinshi by’inkombe z’iki gihugu. Ibi bikomeje guteza impungenge ku mutekano w’inzira z’ubwikorezi bwa peteroli, ndetse ibiciro bya peteroli ku isoko mpuzamahanga bimaze kurenga amadolari 100 kuri barril.