Tanzania mu biganiro na FC Barcelona byo gusimbura DRC
Tanzania iri mu biganiro n’ikipe ya FC Barcelona yo muri Espagne ku bufatanye bushya, mu gihe amasezerano iyi kipe yagiranye na Repubulika Iharanira Demokarasi ya Congo (RDC) akomeje guhura n’ibibazo by’ubwishyu n’impaka ku bagize uruhare mu kuyahuza.
Gatete Jimmy
Amakuru yizewe avuga ko abayobozi ba Tanzania bamaze kugirana ibiganiro n’ubuyobozi bwa FC Barcelona ku mikoranire ishoboka. Icyakora, kugeza ubu nta masezerano yatangajwe ku mugaragaro, ndetse nta cyemezo ko Tanzania yaba igiye gusimbura RDC cyigeze gitangazwa.
Amasezerano ya RDC na FC Barcelona yasinywe mu 2025, akazamara imyaka ine kandi afite agaciro kagereranywa na miliyoni 40 z’amayero. Yari agamije kumenyekanisha RDC ku bakunzi b’umupira w’amaguru ku Isi, hakagaragazwa ibirango by’igihugu ku bikorwa bitandukanye bya Barcelona, ndetse hakashyirwaho na ‘House of DRC’ kuri Stade Camp Nou.
Icyakora, ishyirwa mu bikorwa ry’aya masezerano ryaje kuzamo ibibazo birimo gutinda kwishyura n’impaka ku wagize uruhare mu guhuza impande zombi.
Olivier Nsiabamfumu, wahoze ari umukinnyi w’umupira w’amaguru w’Umufaransa akaba ayobora Ya’ats Sports, avuga ko yatangiye gutegura umushinga w’ubufatanye hagati ya RDC na Barcelona mu 2023.
Mu gihe impaka kuri aya masezerano zigikomeje, Tanzania na yo yakomeje kwegera Barcelona. Muri Nzeri 2026, Paul Makonda, Minisitiri wa Tanzania ushinzwe Itangazamakuru, Umuco, Ubuhanzi na Siporo, yamaze iminsi i Barcelona ku butumire bwa Perezida w’iyi kipe, Joan Laporta.
INDI NKURU WASOMA : UNILAK yahaye impamyabumenyi abanyeshuri 1,247
Makonda yahuye n’abayobozi n’abakinnyi ba Barcelona, ndetse agaragara ari kumwe na Laporta kuri Stade Camp Nou. Uruzinduko rwasobanuwe nk’urugamije guteza imbere umupira w’amaguru no gushimangira ubufatanye, mu gihe Tanzania yitegura kwakira Igikombe cya Afurika cy’Ibihugu cya 2027.
Nubwo ibiganiro bya Tanzania na Barcelona bikomeje, kugeza ubu nta tangazo rivuga ko bigamije gusimbura ubufatanye bwa RDC n’iyi kipe ryigeze gutangazwa.
Ibitekerezo