Uganda: Umwiryane ku uzasimbura Umwami Oyo wateje impaka mu Bami ba Tooro

Abakuru b’imiryango igize ubwoko bw’abami ba Tooro batangaje ko Prince Edward Rukidi Kijanangoma, w’imyaka 56 akaba n’umunyamakuru wa televiziyo, ari we watoranyijwe kugira ngo asimbure Oyo. Icyakora, umuryango wa hafi w’umwami wapfuye wanze kwemera uwo mwanzuro.

Princess Ruth Komuntale, mushiki w’Umwami Oyo, yavuze ko murumuna we yasize ubushake bwe bwanditse mu 2022, aho yari yaragaragaje ko umwana we w’umuhungu ari we uzamusimbura. Uwo mwana yari atarigeze amenyekanishwa ku mugaragaro nk’umuzungura w’ingoma.

Komuntale yavuze ko kuba haratangajwe undi mwami mu gihe umuryango ukiri mu kababaro byateje urujijo n’umwuka mubi. Yashimangiye ko umuryango ushaka ko ibyifuzo by’Umwami Oyo byubahirizwa.

Nyina w’umwami, Queen Best Kemigisa, na we yavuze ko umutekano wari ushinzwe kurinda ibwami wakuweho, abasirikare bakoherezwa hafi y’ingoro, ibintu avuga ko byatumye umuryango ugira imbogamizi mu kugenda no kwakira abashyitsi.

Yasabye Perezida wa Uganda, Yoweri Museveni, n’abayobozi b’ingabo kugira uruhare mu gutuma umuryango ubasha gusezera ku mwana wabo mu mahoro.

Ati: “Ndabasaba abahanganye ku ngoma ko hazabaho igihe cyo kubiganiraho. Reka tubanze tubabare kandi dushyingure Umwami wacu Oyo.”

Umubiri wa Oyo wavuye muri Leta Zunze Ubumwe za Amerika, aho yari ari kwivuriza kanseri, ushyikirizwa Uganda ku wa Gatanu. Biteganyijwe ko ibihumbi by’abaturage bazitabira umuhango wo kumushyingura ku mva z’abami, hafi y’ingoro y’ibwami i Fort Portal.

Tooro ni bumwe mu bwami gakondo bwa Uganda. Nubwo umwami wabwo nta bubasha bwa politiki afite, afite uruhare rukomeye mu muco w’abatuye mu burengerazuba bw’igihugu.

Ikibazo cy’uzasimbura Oyo cyongeye kugaragaza umwihariko w’imigenzo ya Tooro, kuko umwami atagomba gusimburwa gusa hakurikijwe umurongo w’abana b’umwami, ahubwo atoranywa mu muryango w’abami uzwi nka Babiito.

INDI NKURU WASOMA : Ambasaderi Fred Gateretse Ngoga yeguye ku mirimo muri Komisiyo ya AU

Komite ishinzwe guhitamo umwami yavuze ko Kijanangoma yatoranyijwe nyuma y’ibiganiro n’ubusesenguzi bwimbitse, aho abagize komite 19 bashyize umukono ku mwanzuro.

Ku rundi ruhande, umuryango wa Oyo ukomeje gusaba ko ubushake bwe bwanditse bwubahirizwa. Minisitiri w’Umuco, Henry Tumukunde, yatangiye ubuhuza hagati y’impande zombi, mu gihe hategerejwe umwanzuro uzafatwa nyuma y’ibiganiro n’abayobozi b’igihugu ndetse n’abayobozi gakondo.