Umugenzuzi w’imari mu Bwongereza yatangiye gusuzuma ibaruramari rya Manchester City
Urwego rugenzura ibijyanye n’igenzura ry’imari mu Bwongereza, Financial Reporting Council (FRC), rwatangiye iperereza ry’ibanze ku makosa akekwaho kuba yarabaye mu ibaruramari ry’ikipe ya Manchester City, nyuma y’ibirego by’uko ishobora kuba yararenze ku mategeko agenga imari ya shampiyona y’u Bwongereza.
FRC yatangaje ko ku wa 30 Nzeri 2026 yahawe inshingano zo gusuzuma iki kibazo, zisimbura izari zifitwe n’Urugaga rw’Ababaruramari bemewe mu Bwongereza na Wales (ICAEW). Icyakora, uru rwego rwavuze ko iperereza ryemewe ku mugaragaro ritaratangira.
Iki gikorwa gikurikiye icyemezo cya komisiyo yigenga yasanze Manchester City yararenze ku mategeko agenga imari ya Premier League hagati y’umwaka w’imikino wa 2009-2010 n’uwa 2017-2018. Muri ibyo birego harimo gushaka kugaragaza ko ubukungu bw’iyi kipe bukomeye kurusha uko bwari buri, ku gaciro karenga miliyoni 900 z’amapawundi.
Manchester City ntiyemera icyo cyemezo, ivuga ko kirimo amakosa akomeye mu mategeko no mu isesengura ry’ibimenyetso, kandi yatangaje ko izajurira.
Abagenzuzi b’imari bashobora kubazwa
FRC ifite ububasha bwo gusuzuma niba ikigo BDO, cyagenzuraga ibaruramari rya Manchester City, cyarubahirije amahame agenga umwuga w’igenzura ry’imari.
INDI NKURU WASOMA : Cristiano Ronaldo yahagaritswe iminsi 30 nyuma yo kuva mu mwiherero wa Portugal
Komisiyo yigenga yari yasuzumye ibirego yavuze ko Manchester City yahaye abagenzuzi bayo amakuru yashoboraga kubayobya ku nkomoko y’amafaranga yashowe muri iyi kipe n’abanyamigabane.
Liam Byrne, uyobora komisiyo ishinzwe ubucuruzi mu Nteko Ishinga Amategeko y’u Bwongereza, yasabye ko FRC ihabwa ububasha bwisumbuyeho kugira ngo ibashe kubona ibimenyetso no kubaza abayobozi b’ibigo mu manza nk’izi.
Ibitekerezo