Umunyarwanda yasezerewe mu gisirikare cya Amerika nyuma y’imyaka 26

Ku wa Kane, tariki ya 17 Nzeri 2026, i Washington, D.C., habereye umuhango wo gusezera ku mirimo kwa Lt Col James Siibo, witabirwa n’abasirikare bakoranye na we, abo mu muryango we, inshuti n’abandi bashyitsi.

Uyu muhango wabereye ku nyubako ya GAO, ku muhanda wa 441 G Street NW, aho abitabiriye bifatanyije na Siibo mu kwizihiza imyaka 26 yamaze akorera igisirikare cya Amerika no kumwifuriza ishya n’ihirwe mu buzima bushya.

Siibo yashimiwe ku bwitange bwe

Mu muhango wo kumusezeraho, Siibo yahawe ibihembo n’imidari bigaragaza uruhare yagize mu gisirikare cya Amerika.

Mu byangombwa by’ishimwe yahawe harimo icyashyizweho umukono na Perezida Donald Trump, mu nshingano ze nk’Umugaba w’Ikirenga w’Ingabo za Amerika.

Amafoto y’umuhango agaragaza Siibo yambaye imyambaro ya gisirikare, afite imidari n’ibindi byangombwa by’ishimwe. Abasirikare bakoranye na we ndetse n’abagize umuryango we bagaragaye bamushimira no kumusezeraho.

INDI NKURU WASOMA : Abangavu barenga 1,400 batewe inda mu mwaka umwe

Urugendo rwe mu gisirikare

Amakuru ari mu nyandiko za Leta Zunze Ubumwe za Amerika agaragaza ko James Siibo yakoze indi mirimo mu rwego rushinzwe ingabo, harimo inshingano zijyanye na Naval Facilities Engineering Command Far East.

Kuva mu gisirikare kwe ni igikorwa cyagaragaje imyaka myinshi yamaze akorera Amerika, ndetse n’uruhare rw’Abanyamerika bakomoka mu Rwanda mu nzego zitandukanye z’akazi.