Umuryango w’Abibumbye watoye ku ikarita igaragaza neza ubunini bwa Afurika
Inteko Rusange y’Umuryango w’Abibumbye yatoye umwanzuro usaba ko hakwifashishwa ikarita y’isi igaragaza neza kurushaho ubunini nyakuri bw’umugabane wa Afurika, aho gukomeza gukoresha cyane ikarita ya Mercator.
Uyu mwanzuro, witwa “Correct the Map”, wateguwe na Togo ushyigikirwa n’ibihugu bigize Umuryango wa Afurika Yunze Ubumwe. Wemejwe n’amajwi 164, harimo ay’u Bufaransa n’u Bwongereza. Leta Zunze Ubumwe za Amerika ni yo gihugu cyonyine cyawutoyeho, mu gihe ibihugu bitandatu byifashe.
Nubwo uyu mwanzuro udafite imbaraga zo gutegeka ibihugu, biteganyijwe ko ushobora gutuma ibigo n’inzego zitandukanye ku isi bihindura amakarita bifashisha.
Ikarita ya Mercator yakozwe mu 1569 n’umukarani w’amakarita wo mu Bubiligi witwa Gerardus Mercator. Yagenewe gufasha abagenzi n’abashakashatsi mu kuyobora amato, ariko uburyo igaragazamo ubunini bw’uturere bwagiye bunengwa.
Urugero rukunze gutangwa ni urwa Greenland, igaragara nk’aho ingana na Afurika, kandi Afurika ifite ubuso bwa kilometero kare miliyoni 30,4 mu gihe Greenland ifite hafi miliyoni 2,2. Ibi bivuze ko Afurika iruta Greenland hafi inshuro 14.
INDI NKURU WASOMA :Bwiza yatangaje ko ubukwe bwe buri hafi
Mu 2018, abakora amakarita bakoze Equal Earth, ikarita igamije kugaragaza neza ubuso bw’imigabane. Muri Gashyantare, ibihugu 54 bigize AU byayemeje nk’ikarita igaragaza neza cyane cyane ubunini bwa Afurika.
Minisitiri w’Ububanyi n’Amahanga wa Togo, Robert Dussey, yavuze ko “isi irenganuye itangirira ku ikarita irenganuye.” Abashyigikiye impinduka bavuga ko amakarita atari ibikoresho byo kwifashisha mu ngendo gusa, ahubwo agira uruhare mu buryo abantu babona imigabane n’ubushobozi bwayo.
Ibitekerezo