Uwunganira Ingabire Victoire yihanangirijwe
Me Gatera Gashabana, umwe mu banyamategeko batatu bunganira Ingabire Umuhoza Victoire, yongeye kwihanangirizwa n’Urukiko Rukuru rwa Kigali nyuma yo kugarura mu iburanisha ikibazo rwari rwarafatiyeho umwanzuro.
Me Gatera yihanangirijwe ku wa 6 Ukwakira 2026, ubwo yari yagaragaje impamvu avuga ko zikwiye gutuma ibyaha Ingabire akurikiranyweho bidafatwa nk’ibihamya bihagije.
Uyu munyamategeko yavuze ko nubwo urukiko rwari rwarafashe icyemezo ku kimenyetso cy’ibanga ry’umwuga ku wa 21 Nzeri, atigeze acyemera. Yavuze ko kutemerwa k’ubusabe bwe byabangamira uburenganzira bwo kwiregura.
Ati: “Icyemezo cyarafashwe, igisigaye ni ukukijuririra.”
Perezida w’iburanisha yamwibukije ko nk’umunyamategeko agomba kubahiriza imigendekere y’urubanza, amubwira ko kugarura ikibazo cyari cyafatiweho umwanzuro ari ugutandukira.
Ati: “Murimo gutandukira. Turabagaruye.”
Yanategetse umwanditsi w’urukiko kwandika ko Me Gatera “agaruwe ku murongo.”
Impaka ku kimenyetso cy’ibanga
Ku wa 21 Nzeri, Me Gatera yari yasabye ko urukiko rwashyira mu muhezo igihe Ubushinjacyaha bwari kuba bwerekana ikimenyetso avuga ko gifitanye isano n’ibanga ry’umwuga hagati ye n’abakiliya be.
INDI NKURU WASOMA : Abashinzwe umutekano bambaye impuzankano bakumiriwe mu rubanza rurimo umwana
Urukiko rwamwibukije ko inzitizi ku bimenyetso zigomba gutangwa mu iburanisha ry’ibanze, ryabaye ku wa 17 Kamena 2026.
Me Gatera yasubije ko atazongera kuvuga kuri icyo kibazo, asaba imbabazi.
Ingabire akurikiranyweho ibyaha birindwi bifitanye isano n’umugambi wo gukuraho ubutegetsi. Abandi bamwunganira ni Me Bruce Bikotwa na Me Gashema Félicien.
Ibitekerezo